Tilskotsordninga skal støtte idretts- og skyttarlag i Dovre kommune, med hovudvekt på aktivitet for barn og unge. Ordninga skal samtidig bidra til eit berekraftig og mangfaldig aktivitetstilbod for vaksne, og fremje frivillig innsats i lokalsamfunnet.

Ordninga gjeld idretts- og skyttarlag i Dovre som er registrerte i Noregs idrettsforbund (NIF) og Det frivillige skyttarvesen (DFS). Tilskotet går til hovudlaget, ikkje til enkeltgrupper i same organisasjon.

For å redusere rapporteringsbyrda skal laga ikkje sende inn årsmelding, rekneskap eller medlemslister. Kommunen kan be om tilleggsdokumentasjon ved kontroll eller mistanke om avvik.

Kommunen hentar nødvendige data slik:

• Idrettslag: medlemstal via idrettsrådet basert på Samordna rapportering (NIF)
• Skyttarlag: medlemstal frå søknadsskjemaet, som skyttarlaga har henta frå DFS sitt medlemsregister (Mitt DFS)

Steg 1 – Grunnbeløp
Alle lag som kvalifiserer til tilskot får eit grunnbeløp på 2 000 kroner. Administrasjonen kan justere dette ut frå den årlege budsjettramma.

Steg 2 – Fordeling av restpotten
Resterande tilskotsmidlar blir fordelte slik, basert på tal på medlemmar i Dovre:

• 75 % etter tal på medlemmar 0–19 år
• 25 % etter tal på medlemmar 20+ år

Medlemstala skal vera basert på siste rapporteringsår i NIF/DFS.

Retningslinene gjeld frå og med tilskotsåret 2026, og skal evaluerast etter det fyrste året. 

Sakspapira frå Oppvekst-, kultur- og omsorgsutvalet 16. mars 2026