Her er vinnarane av årets kulturprisar og stipend i Dovre

Oppvekst-, kultur- og omsorgsutvalet deler ut tre prisar og stipend innan kultur og idrett for 2026. Mottakarane er 

  • Kenneth Nystuen Dalum (Kulturprisen i Dovre), 
  • Martine Haugen og Gabriela Avagian (deler Dovre kommunes idretts- og kulturstipend) 
  • Lily Scarlett Tillery Vorkinn (Ungdommens idretts- og kulturpris).

Kulturprisen i Dovre 2026 går til Kenneth Nystuen Dalum

Kulturprisen i Dovre blir gjeve til ein person, ei verksemd eller ein organisasjon som har vore med på å fremje kulturlivet i Dovre og elles gjort seg fortent til prisen gjennom sin kulturelle innsats for bygda. Prisen er eit diplom i utskore ramme og 5.000 kr. 

Kenneth Nystuen Dalum får prisen for sitt arbeid for fotballen i Dovre. Han har hatt ei sentral rolle i Dombås IL Fotball i mange år, og har vore med på å bygge opp eit miljø som er svært viktig for mange barn, unge og vaksne i bygda. 

Han starta som trenar da han var 16 år, har leia fotballgruppa i mange år, organisert både Tine fotballskule, Copa del Myra og Snøhetta-cup, og er både trenar, dommar og speaker. I tillegg har han vore drivkraft bak inkluderande aktivitetar som frivillige treningar og open hall. Oppvekst-, kultur- og omsorgsutvalet ynskjer med denne prisen å takke Kenneth Nystuen Dalum for hans positive og energiske innsats for lokalsamfunnet, ikkje minst for dei yngre innbyggarane våre. 

Les om statuttane her

Dovre kommunes idretts- og kulturstipend 2026 blir delt mellom Gabriela Avagian og Martine Haugen

Dovre kommunes idretts- og kulturstipend skal gje utøvaren moglegheiter for vidareutvikling i sin profesjon. Innan idrett kan stipendet gå til ein lovande utøvar som er etablert på nasjonalt nivå, og som er i ferd med å etablere seg på internasjonalt nivå. Innan kultur kan stipendet bli gjeve til ein person som har utmerka seg gjennom kulturell utfalding eller skapande verksemd og som er i ferd med å etablere seg på eit profesjonelt nivå. Stipendet er på totalt 20.000 kr, og blir i 2026 delt mellom Gabriela Avagian (paragliding) og Martine Haugen (musikk). 

Gabriela Avagian har sidan ho starta med paragliding i 2017 utvikla seg til å bli ein av Noregs mest aktive konkurransepilotar innan dei to fysisk krevjande disiplinane hike&fly og cross country. Avagian vart nordisk og norsk meister i kvinneklassen i 2025, og har i 2026 teke steget internasjonalt i EM i Nord-Makedonia og den sju dagar lange konkurransen X-Pyr i Pyreneane.

Martine Haugen har i mange år vore ei sterk stemme i det norske country- og Americana-miljøet. Ho vakte merksemd da ho som 14-åring portretterte June Carter i eit Johnny Cash-tributeband og turnerte med dei. Ho er ein viktig bidragsytar til kulturlivet i Dovre og har gjeve ut eit album med bandet Gone North. Ho har vore med på mange samarbeidsprosjekt med andre etablerte artistar. I 2026 har ho satsa hardt på si eiga artistkarriere og gjeve ut sitt fyrste soloalbum "Hardships and Hope". Albumet er eit møte mellom tradisjonell country og moderne Americana, med ni sjølvkomponerte låtar i tillegg til cover-låtar. 

Les om statuttane her

Ungdommens idretts- og kulturpris 2026 går til Lily Scarlett Tillery Vorkinn

Ungdommens idretts- og kulturpris skal gje motivasjon og vera ei påskjønning for ungdom under 20 år i Dovre. Saman med eit diplom er prisen på kr 1500,-

Oppvekst-, kultur- og omsorgsutvalet deler i 2026 ut stipendet til Lily Scarlett Tillery Vorkinn. Ho har halde på med visuell kunst i fleire år, og satsar vidare på feltet som elev på Kunst, Design og Arkitektur på Edvard Munch videregående.

Les om statuttane for prisen her

Sist endret 18.09.2026 19.58