Tilskot til musikk, dans og annan kulturaktivitet

Tilskotsordninga skal støtte frivillige lag og foreiningar innan musikk, dans og annan kulturaktivitet i Dovre kommune. Midlane skal bidra til stabil drift, rekruttering og inkludering, og vere retta mot aktivitet som er open og tilgjengeleg for innbyggjarane.

Ordninga er ei drifts- og medlemsstøtteordning. Prosjekt, kurs, større enkeltarrangement og investeringar blir ikkje støtta i denne ordninga.

Ordninga gjeld frivillige lag og foreiningar innan musikk, dans og annan kulturaktivitet som er heimehøyrande i Dovre kommune og registrerte i Brønnøysundregisteret. Tilskotet blir berre gitt til hovudlaget, ikkje til undergrupper i same organisasjon.

For å redusere rapporteringsbyrda skal laga ikkje sende inn årsmelding, rekneskap eller medlemslister rutinemessig. Kommunen kan be om tilleggsdokumentasjon ved stikkprøve.

Søkaren skal oppgje medlemstala slik:

• Medlemstal per 31.12 føregåande år
• Berre aktive medlemmar busette i Dovre skal telje.

Steg 1 – Grunnbeløp

Grunnbeløpet blir fastsett av administrasjonen kvart år etter søknadsfristen, basert på talet på søkjarar og disponibel pott. Grunnbeløpet skal ligge mellom 3 000 og 6 000 kroner per lag og normalt ikkje overstige 70 prosent av den totale potten.

Steg 2 – Medlemsbasert fordeling

Resterande midlar blir fordelte etter medlemstal, med aldersvekting der 0–19 år = 2 poeng og 20+ år = 1 poeng. Maksimalt tilskot per lag er 20 000 kroner.

Steg 3 – Oppdragsbonus

Lag som gjev faste kulturtenester for kommunen, som musikalske innslag på 17. mai eller andre kommunale merkedagar, kan få eit moderat årleg oppdragstillegg (2 000–4 000 kroner). Dette kjem i tillegg til utrekna driftstilskot og påverkar ikkje den generelle fordelingsmodellen.

Retningslinene gjeld frå og med tilskotsåret 2026, og skal evaluerast etter det fyrste året.

Sakspapira frå møtet i Oppvekst-, kultur- og omsorgsutvalet 16. mars 2026