Utfordringar
Som ei lita distriktskommune står Dovre overfor nokre utviklingstrekk og utfordringar som påverkar kommunen på ulike måtar:
Demografisk utvikling
Dovre kommune har sidan midt på 1980- tallet hatt ein gradvis nedgang i folketalet og reduksjon i skatteinntektene. Sidan 2023 har vi hatt ei svak vekst i antall innbyggarar på grunn av økt innvandring, men den langsiktige trenden er at vi blir færre i yrkesaktiv alder. Ei aldrande befolkning fører til større behov for helse- og omsorgstenester og rekrutteringsutfordringar i fleire sektorar. Til saman utfordrar dette kommunen si økonomiske berekraft.
Kapasitet og kompetanse i møte med nye oppgåver
Norske kommunar har over tid fått fleire lovpålagte oppgåver. Dette har ført til ei auke i kommunale tenester og behov for fleire tilsette i desse tenestene. Som i mange andre små distriktskommunar, kan det òg i Dovre bli utfordrande å rekruttere folk og oppfylle nye krav til spesialisert og tverrfagleg kompetanse.
Samarbeid om næringsutvikling
Næringslivet i Dovre møter utfordringar knytt til infrastruktur og tilgang på kompetanse og kapital. Med ein relativt einsidig næringsstruktur, er det behov for meir samarbeid mellom næringsaktørar, kommunen og ulike delar av verkemiddelapparatet. I jordbruket skapar nye krav og låg lønsamheit utfordringar for Dovre-bonden og fjellandbruket.
Press på areal og samfunnsutvikling
Vi lev midt mellom nasjonalparkar vi er stolte av og vil forvalte med lokal kunnskap. Om lag 75 prosent av arealet i kommunen er underlagt ei eller anna form for vern. Vi ser eit aukande press på areala i kommunen. Verneområde, areal for turisme og ferdsel, bustader, næring og industri, og gode møteplassar for folk. I tillegg vil vi bevare ressursgrunnlaget, naturmangfaldet, kulturlandskapet, utmarksressursane og kulturminna. Mange omsyn skal vegast opp mot kvarandre når vi skal utvikle samfunnet.
Klimagassutslepp
Som i resten av Innlandet, kjem størstedelen av klimagassutsleppa i Dovre frå vegtrafikk (særleg gjennomgåande tungtrafikk) og jordbruk. Vi har ikkje tal som syner utslepp som følgje av forbruk i kvar kommune, men vi veit at to tredelar av utslepp frå nordmenn sitt forbruk skjer i andre land.
Kommunikasjon og omdømme
Det er ei utfordring for kommunen å sikre at innbyggarane får den informasjonen dei treng. Kommunikasjonen frå kommunen kan òg vera vanskeleg å forstå for nokre. Digitalisering og nye informasjonskanalar gjev store moglegheiter, men det er òg krevjande å nå ut med informasjon til innbyggarar som ikkje er på desse digitale plattformene.
Beredskap
Den sikkerheitspolitiske situasjonen stiller auka krav til vår beredskap og evne til å handtere kriser. Vi må derfor styrke Dovre-samfunnet sitt samhald og motstandskraft i møtet med kriser som måtte oppstå.
Statsforvaltaren i Innlandet